Mater - cyfarfodydd

Cyflwynodd y Rheolwr Perfformiad a'r Swyddog Perfformiad y Gofrestr Risg Strategol yr Awdurdod Cyfan, gan gynnwys yn benodol effaith COVID 19, gan nodi bod gan y Pwyllgor Archwilio rôl benodol i gael sicrwydd ynghylch digonolrwydd fframwaith rheoli risg y Cyngor.  Atgoffwyd yr Aelodau bod y gofrestr yn gywir ar adeg ei dosbarthu gyda'r agenda ond ei bod yn cael ei hadolygu'n gyson er mwyn adlewyrchu'r sefyllfa ddeinamig a gyflwynwyd gan COVID 19.  Ar ôl cyflwyno'r adroddiad, gofynnodd Aelodau'r Pwyllgor gwestiynau fel a ganlyn:

Soniodd Aelod am lwybr annisgwyl eleni, gan gyfeirio at y llifogydd a COVID 19.  Gwelwyd bod pedair risg newydd y bydd hynny'n cael eu dwyn ymlaen o bosibl am ychydig flynyddoedd.   Gofynnodd aelod am allu'r awdurdod i liniaru risg erbyn diwedd y flwyddyn o ystyried yr ansicrwydd ynghylch cytundeb Brexit (risg bosibl o ansicrwydd gwleidyddol, deddfwriaethol ac ariannol i wasanaethau cynghorau a busnesau lleol o ganlyniad i'r DU yn gadael yr Undeb Ewropeaidd - sgôr Uchel).  Roedd hyn yn cyd-fynd ag effaith y llifogydd a COVID 19.   Esboniwyd bod y gofrestr risg yn nodi'r ymateb i'r risg e.e. gwaith y Gweithgor Brexit, cysylltu â phartneriaid ac ati. Mae'n ddogfen ddeinamig sy'n cael ei diweddaru wrth i wybodaeth newydd ddod ar gael.   Darparodd y Prif Swyddog y wybodaeth ddiweddaraf o gyfarfod diweddar o'r Gweithgor Brexit fod risgiau fel cadwyni cyflenwi, caffael a chyflenwad bwyd yn parhau i fod yn destun pryder ers COVID 19.   Gallai'r potensial ar gyfer ail don o COVID 19 waethygu materion bwyd, Cyfarpar Diogelu Personol a chyflenwad meddygol.  Mae gan Lywodraeth Cymru ei gr?p parodrwydd ei hun wedi'i sefydlu ac mae gan yr awdurdod gyswllt rheolaidd.   Yn lleol, mae'r strwythurau cynllunio at argyfwng yn cynnwys Gr?p Cydgysylltu Strategol Gwent gyfan (yr Heddlu, Iechyd, awdurdodau lleol a phartneriaid eraill) sy'n asesu risgiau sy’n gysylltiedig â COVID a Brexit, gan fonitro’n weithredol y datblygiadau. 

Cyfeiriodd Aelod at Risg 1 (Risg bosibl nad yw'r awdurdod yn parhau'n berthnasol ac yn hyfyw ar gyfer cenedlaethau'r dyfodol oherwydd nad oes ganddo fodel cyflawni cynaliadwy) a'i symud o lefel Isel i lefel Ganolig.  Dywedwyd bod hwn yn asesiad priodol oherwydd yr iawndal isel a gafwyd am y llifogydd.  Hawliwyd £307,000 a dyfarnwyd £7,000, felly mae risg resymol na ellir adennill yr arian a wariwyd ar COVID 19.

Nododd y Pwyllgor yr argymhellion canlynol:

1.    Dylai’r Aelodau'n defnyddio'r asesiad risg i ystyried effeithiolrwydd trefniadau rheoli risg yr awdurdod ac i ba raddau y mae'r risgiau strategol sy'n wynebu'r awdurdod wedi'u cynnwys yn briodol.

2.    Bod aelodau'n craffu, yn barhaus, ar yr asesiad risg a'r deiliaid cyfrifoldeb i sicrhau bod risg yn cael ei rheoli'n briodol.